التوست الأسمر او توست الدقيق كامل الحبة:من فوائده في خسارة الوزن أنة يمنح الجسم قدراً من النشويات المفيدة لذلك تعتمد علية برامج الرجيم على خبز التوست، ويُفضّل تناول خبز التوست الأسمر لاحتوائهِ على الألياف التّي تُساعد على الشبع بسُرعة بالإضافة إلى أنّها تمنع حدوث الإمساك.

مقادير التوست الأسمر:

• 3 كوب دقيق قمح كامل انا بستخدم (دقيق سنبلة الفرات )متوفر في السوبر ماركت.
• معلقة صغيرة مليانة خميرة فورية.
• رشة ملح.
• معلقتين كبار سكر او عسل نحل.
• معلقتين كبار زيت زتون او زيت ذرة.
• معلقة صغيرة خل.
• كوب الا ربع ماية دافية.

تعرف علي اضرار الدقيق الابيض.

طريقة تحضير التوست الأسمر:

1- هنحط المكونات كلها علي بعض ونقلبهم كويس  ماعدا الدقيق يعني (  الخميرة ورشه الملح والزيت والخل والسكر والماية).

2- ونقلبهم كويس جدا مع بعض لحد مايندمجوا كويس.
3- هضيف الخليط السائل للدقيق واقلبهم مع بعض.
4- هنزل العجينة على الرخامة وارش رشة بسيطة من الدقيق وهعجنها لمدة عشر دقايق  ولو احتاجنا ماية نضيف لحد مالعجينه تظبط معانا و تتماسك ومتكنش بتقطع نعجن لحد ما تكون بتمط .
5- خطوة العجن دي مهمة جدًا وهي اللي هتفرق في نتيجة الخبز .

6- هدهنها بمسحة من الزيت وهغطيها بكيس بلاستيك وبعدين فوط وهسيبها تخمر .

7-لو الجو دافي هتاخد من ٣٠-٤٠ دقيقة .. لو برد ممكن تقعد ساعة .

8- بعد ما التوست يتخمر  هجيب العجينة والفها رول كدة  بس نحاول طول العجينة يبقي اد طول القالب وبعدين ادهن القالب زبدة ورشة من الدقيق.

9- ونسيبة يخمر تاني في القالب حوالي ساعة.

10- وبعدين بعد مايخمر في القالب ندهن وشه بمسحة ماية ونرش علية شوفان وممكن بزور الكتان حسب الرغبة.

11- انا بحط علي اول رف من الفرن صنية فيها ماية سخنة  وبعدين بحط القالب في صنية اكبر عشان يكون معدول وعلي الشبكة في نص الفرن.

12-  وبعدين هندخله فرن سخن على  ٢٠٠  اول عشر دقايق لحد ما يتماسك وبعدين هنهدي ل ١٨٠ يكمل تسوية براحته .. بياخد حوالي نص ساعة كمان .. بس الأفضل تتابعي فرنك  عشان لو عالي.
13- لو احمر من تحت ولسه لونه فاتح من فوق ارفعيه دقايق للشواية .
14- لو فرنك كهربا.. شغليه من فوق وتحت زي ما بتعملي الكيك ولو غاز بنحط القالب ف الرف الوسط زي الكيك .
15- أول ما بيخرج بيكون طري من الجوانب وناشف من فوق .. عااادي جدًا .. متقلقيش .
16- هنخرجه براحة من القالب وهو سخن علي شبكة اي شبكة ممكن رف من بتوع التلاجة عشان يكون تحتة هوا وميتعجنش وهنغطية بفوطة علي لحد مايبرد خالص  وهتلاقي ريحتة تحفة .
17- بنقطعه يعد ما يبرد تمامااااا بسكينة منشار أو زي اللي في الصورة  .

18- بعد مابقطعة بحطة في كيس  واربطة من فوق واشيلة في الفريزر واطلع منة قبل الاكل بربع ساعة.

 

كيفية ضبط نسبة الكوليسترول في الدم عن طريق الطعام.

سر نجاح التوست الاسمر:

• هنعرف إن قوام العجينة بقى مضبوط لما أضغط عليها بصباعي ألاقيها بترجع تاني بتمط .
• ممكن تضغطي عليها ضغطات كتير بنشابة كبيرة .. دي مقترحات بتسهل العجن .
• نوع الخميرة يكون كويس وتكوني مجرباة.
• التخمير بعد مانحطة في القالب مهم جدا عشان يطلع هش .
•  بنقطعه لما يبرد خالص وبنحفظة  متقطع في كيس بلاستيك علي الفريز  أو فوطة جوا علبة مقفولة كويس في التلاجة مدة ٣-٥ أيام .
• التوست طري وهش وجميل ..والميزة إنك هتشبعي منه بكمية أقل جدًا بسبب الألياف اللي فيه .
• لو مش عندك قالب التوست اعمليه رول بحجم متوسط وسيبيه يتخمر على صينية  عادي هيكون جميل جدًا بس شكله مختلف شوية بس .

فوائد التوست الأسمر:

1-يعتبر  التوست  الأسمر المصنوع من حبوب القمح الكامل أحد أعلى الحبوب الكاملة بالألياف الغذائيّة.

2-ومن فوائد خبز القمح الكامل في خسارة الوزن هو أن الأغذية الغنية بالألياف الغذائية تساعد على الشعور بالشبع وتزيد من مدة الشعور بالشبع بعده أي بين الوجبات مما ييقلل من كمية الطعام والسعرات الحرارية المتناولة.

3- كما ان الألياف الغذائية تبطئ من امتصاص الطعام وتبقيه في الجهاز الهضمي لفترات أطول.

وصفات متشابهه: وجبات متنوعة للدايت وبالسعرات الحرارية.