مقادير عمل المنين بالعجوه:
- كيلو دقيق يكون نوع كويس
- نص كيلو سمنة (2 كوب سمنة سايحة)
- 2 بيضة
- معلقة كبيرة مليانة بيكنج بودر
- 3 معالق كبيرة سكر
- معلقة صغيرة فانيليا او (كيسين فانيليا)
- كوب حليب دافي
- عجوه
- رشة ملح
لدهن الوجه:
- سمسم
- بيضة
طريقة تحضير المنين بالعجوه:
- في طبق العجن هنحط الدقيق ونحط علية رشة الملح والبيكنج بودر و نحط السكر ونقلبهم (دي كدا المكونات الجافة).
- وبعدين نسيح السمنة وتكون دافية شوية مش سخنة ونحطها علي الدقيق.
- ونعجن الدقيق مع السمنة كويس جدا ونبس اهم حاجة العجن.
- وبعدين نجيب البيض ونحط علية الفانيليا وبعدين ننزل بية علي الدقيق ونعجن كويس بايدك كويس.
- وبعدين نحط اللبن واحدة واحدة ممكن منحتاجش الكوباية كلها ونعجن شوية هنلاقيها بقت طرية وجميلة.
- ونسيبها ترتاح 10 دقايق.
- نجهز بقا العجوه لو ناشفة نحطها في طاسة علي البوتجاز ونحط معلقة سمنة ونقلبها براحة هتتطري معانا وهتبقي زي العجينة.
- علي الرخامة بقا بتاعة المطبخ ناخد حتة عجينة ونعملها زي الاسطوانة كدة ونبططها براحة باايدنا ونجيب حتة عجوه ونبرمها بايدنا بطول العجينة اللي علي الرخامة ونحطها في النص ونقفل علي العجوة براحة بصوابعنا يعني نقلب الجزء دا علي الجزء دا ونبطط براحة ونلمها من الجنب عشان تكون متساوية.
- وبعدين نجيب سكينة ونقطع بالورب كدا او بالطريقة اللي تحبيها.
- نجيب صنية كبيرة ونرص المنين فيها .
- وندهن الوش بيض ونرش سمسم وندخلة فرن سخن علي درجة حرارة 180 لحد ياخد لون من تحت وبعدين نشغل الشواية ياخد لون دهبي شوية.
- ويقدم بالف هنا.
- الكيلو دقيق عمل كميه ماشاء الله كويسة جدا نقدر نزود او نضاعف الكمية عادي جدا براحتنا .
طريقة الحفظ:
- في علبة محكمة بغطاء نرص فيها المنين او القراقيش بالعجوه ونغطي انا بعمل بالتلاتة كيلو دقيق وبيعدوا عندي بالشهرين زى الفل وبيفضل مقرمش من برة وطري من جوة مش ناشف وريحتة حلوة اوي.
- او حلة استانلس كبيرة نحطة فيها ونغطي بالغطا.
- او علبة بسكوت معدن.
وصفات متشابهة:طريقة عمل البسبوسة بالمكسرات.
