أطباق رئيسيه

طريقة عمل كبسة الفراخ المصرية بطريقة المطاعم

طريقة الكبسة المصرية بطريقة مختلفه وتتبيلة مميزة والطعم حكاية

الكبسة المصرية: تعتبر كبسة الدجاج (الفراخ)تحديداً من اشهر المأكولات في الوطن العربي والسعودية بشكل خاص , وتتنوع الكبسة فيوجد كبسة بالدجاج (الفراخ ) وايضاً يوجد كبسة اللحم ( كبسة باللحمة ) ويوجد العديد من طرق عمل الكبسة السعودية وسنتطرق اليوم لنتعرف علي طريقة عمل الكبسة السعودية بالدجاج من المطبخ .

مقادير كبسة الفراخ :

لتتبيلة الفراخ:

  • فرخة متوسطة الحجم .
  • علبة زبادي.
  • بصلة كبيرة مفرومة.
  • فصين توم مبشورين.
  • معلقة كبيرة من بهارات الفراخ.
  • معلقة صغيرة مليانة ملح.
  • معلقة صغيرة بابريكا.
  •  نص معلقة صغيرة فلفل اسود.
  • نص معلقة صغيرة كمون.
  • معلقة كبيرة خل.
  • نص معلقة صغيرة كركم.

طريقة عمل كبسة الفراخ بالطريقة السعودية.

لعمل الرز:

  • 3 كوب من الرز البسمتي.
  • بصلة صغيرة مفرومة.
  • جزرة متوسطة مبشورة.
  • زيت.
  • عود قرفة.
  • 3 فص حبهان.
  • معلقة كبيرة كركم.
  • نص معلقة صغيرة كاري.
  • مكعب مرقة او (شوربة فراخ).
  • ملح .
  • نص معلقة صغيرة كمون.
  • نص معلقة صغيرة فلفل اسود.

لعمل الصوص المقدم مع الكبسة:

  • حبة طماطم كبيرة.
  • فصين توم.
  • فلفل شطة اخضر.
  • ملح .
  • كمون.

طريقة عمل الفراخ المشوية بالخضار.

طريقة تحضير كبسة الفراخ :

  1. اول حاجة هنغسل الفرخة كويس جدا ونشيل كل الجلد اللي عليها ونقطعها 8 قطع ونسيبها تتصفي.
  2. هنبشر البصلة والتوم ونحط الزبادي والملح والكمون والفلفل الاسود وبهارات الفراخ والبابريكا والكركم ومعلقة الخل ونقلبهم كويس ونحطهم علي الفراخ ونسبها في التتبيلة ساعتيين وممكن من بليل في التلاجة.
  3. وبعدين نرص الفراخ في الصنية وننزل بكل التتبيلة بتاعتنا عليها ونغطي الصنية بالفويل وعلي الفرن علي درجة حرارة 200 لمدة ساعة .
  4. نيجي بقا للرز هنغسل الرز كويس وبعدين ننقع الرز في ماية دافية  ساعة قبل الطبخ ونحط في الماية نص معلقة ملح .
  5. نجيب الحلة ونحط فيها الزيت يسخن وننزل بالبصلة المفرومة ونشوحها وبعدين نحط الحبهان وعود القرفة والكركم والكارى والفلفل الاسود والكمون و مكعب المرقة والجزرة المبشورة ونقلبهم كلهم ويتشوحوا مع البصلة.
  6. وبعدين نصفي الرز ونغسلة وبعدين نحطة في الحلة ونقلب كويس ولازم يتغلف كلة بالزيت وبعد ننزل بالماية او الشوربة ونظبط الملح بتاعنا واول مايتشرب الماية كلها نهدي النار ونسيبة يستوي براحتة.
  7. ملحوظة كوباية  الرز البسمتي بتاخد 2 كوب شوربة بس لو نقعينة بنحط كوب وربع ماية او شوربة ولو احتاج نحط تاني عشان ميتعجنش بس .
  8. نروح بقا للفراخ ونشوفها لو استوت بنشيل الفويل ونشغل الشواية تاخد لون .
  9. وبعدين اول مالرز يتشرب الشوربة كلها بنرص الفراخ علي وشة ونهدي النار .
  10. ونقدمة مع الصوص الاحمر.

وصفات متشابهه: طريقة عمل مقلوبة الفراخ .

طريقة تحضير الصوص المقدم مع الكبسة:

  1. في الكبة بنحط الطماطم وعليها الفلفل الشطة الاخضر  والكمون وفصين توم ونضربهم كويس وبعدين نظبط الملح.
  2. لو مش متاح كبة ( هنبشر الطماطم وبعدين فصين التوم ونقطع الفلفل الشطة صغير جدا ونحط الملح والكمون )

شاهد المزيد: طريقة عمل الكبسة الفلسطينية بالدجاج.

 

الوسوم
زر الذهاب إلى الأعلى
إغلاق